Andries Bezuidenhout Vir ’n lang tyd is enigiemand wat min of meer nie rassisties wou wees nie, wat voel gay mense behoort dieselfde huweliksregte as heteroseksuele mense te geniet of wat dink vroue hoef nie kaalvoet en swanger voor die stoof te staan nie, as politiek korrek bestempel.
Mense soos ons (want ek skaar my by mense wat sulke menings huldig) is beskou as mense sonder ruggraat omdat ons kwansuis politieke modes navolg.
“Progressiewes dra hul ‘linksheid’ soos Gucci of Police,” skryf iemand twee weke gelede as kommentaar op Jaco Kirsten se rubriek.
Vir lank is “links” en “politiek korrek” as sinonieme gebruik. Wel, die einde van daardie tydperk het aangebreek.
Ek het die afgelope tyd tot die besef gekom dat dit nie meer in die mode is om links te wees nie. Ten minste nie as jy witterig en Afrikaans is nie. Dis amptelik, die meerderheid van “ons” ondersteun die gedagte van ’n volkstaat en die meerderheid voel FW de Klerk se toespraak in 1990 was nie ’n goeie idee nie.
Ek weet! Niemand het ’n referendum gehou nie.
Hierdie indrukke is gegrond op die stemmings wat koerante deesdae op hul webwerwe hou. Maar ek dink ook nie ons linkses is so besig om neoliberalisme te beveg dat ons nie tyd het om die koerant oor die internet te lees nie.
Ons moet ruiterlik erken dat ons verloor het.
Die einde van die linkses het aangebreek.
Ons kan nie meer politiek korrek wees nie, want ons is amptelik uit die mode; só verlede seisoen. Jan-Jan Joubert sê dan ook so.
En daar is nie eens ’n linkse volkstaat vir ons nie.
Julle glo my nie?
Gaan lees ’n bietjie die kommentaar wat Suid-Afrikaners vir mekaar oor die internet skryf. Deesdae skryf hulle kaalvuis. Daar is nie ’n sweempie politieke korrektheid nie. Hulle haat mekaar openlik en met passie.
? Ene “Alkie” skryf: “Ek het ‘Nee’ gestem. Omdat God se Woord jou leer dat jy nie mag onderhandel met die goddeloses nie. Jy mag nie onderhandel oor ’n stukkie grond wat joune is nie. Jy mag nie onderhandel met volke wat nie jou volk is nie. Jy mag nie ’n kontrak met hulle sluit nie.”
Op die sportblaaie snou “Bulls fan” iemand toe: “Jy praat so baie van moffies dat ons almal nou weet jy is een. So, hierdie forum is nie vir jou soort nie, gaan kyk netbal.”
Sarel Fourie sê weer: “Hoor gisteraand op SABC2 die afgelope jaar is 82 ambulanse in Limpopo of Mpumalanga weg. Meskien helle is nou e-taxis, eisj.”
Iemand wat net as “S” bekend staan, skryf: “Vroue word in hoër poste aangestel en mans word daaruit gehaal. Nou sit mans by die huis en moet kinders grootmaak en vroue sit in mans se posisies by die werk. God het vroue gemaak om kinders groot te maak en hul gesin te versorg en mans om die werk te gaan doen en te sorg vir hul gesin.”
Dan is daar “Cv”, heel veglustig: “Ek wens hier kan liewer ’n oorlog uitbreek en klaar kry want ek weet wie het nie die moed (balls, like the English say) om in ’n vuurwarm geveg te bly staan nie! Het jy al gesien hoe hulle kan hardloop as die derde skoot klap?”
Dis maar net paar voorbeelde uit baie. Ek het hier en daar tik- en spelfoute reggemaak.
Hierdie menings word nie in die geheim om braaivleisvure uitgespreek nie.
Dit kom nie van klein, versteekte blogs nie.
Dis op hoofstroomkoerante se webwerwe, ongesensor, vir almal wat kan lees.
Aan al Suid-Afrika se wit en swart rassiste, homofobe en seksiste dus die volgende: Julle het gewen.
Julle haat mekaar, verwag bitter min van mekaar en gun mekaar niks.
Wat nou?
http://www.rapport.co.za/Content/Rubrieke/AndriesBezuidenhout/2386/872a6d3772ac44f6988d07fce57b4471/13-02-2010-02-34/_Die_einde_van_politieke_korrektheid
