Konferensie oor Onteieningswet Daar is groot kommer dat die openbare verhore wat plaasgevind het oor
die omstrede voorgestelde Onteieningswet, geen invloed op die regering
gaan hê nie en dat die wet, selfs in sy huidige robuuste vorm, eenvoudig
deur gestoomroller gaan word deur die ANC met sy tweederde meerderheid
in die Parlement.
Dit was tydens die openbare verhore, maar veral tydens die parlementêre
voorleggings, baie duidelik dat enige kommer, beswaar of insette, uiters
vyandig aanvaar is deur die regeringslui wat by die onderskeie
geleenthede voorgesit het.
Daar is kommer oor die gebrek aan sensitiwiteit oor die uitwerking wat
die voorgestelde wet op die ekonomie gaan hê, dat dit beleggersvertroue
kan skaad, dat voedselsekerheid ernstig in gedrang gaan kom en dat
hierdie aspekte nie behoorlik nagevors en verreken is voordat hierdie
polities gedrewe wet opgestel is nie.
Dit is duidelik dat daar baie kommer en selfs openlike weerstand aan die
opbou is teen die beoogde onteieningswet , soos geblyk het tydens die
openbare verhore. Die openbare verhore wat in die provinsies gereël is
was chaoties en voldoen heel waarskynlik nie aan die vereistes vir
openbare konsultasie wat deur die Grondwetlike Hof neergelê is nie.
Nietemin het onverwagte getalle individue en organisasies aan die
verrigtinge deelgeneem.
Die groot aantal persone uit alle sektore van die gemeenskap wat die
gevare beklemtoon het, selfs ook die finansiële instellings, asook die
geldige besware geopper, behoort die opstellers van hierdie wet tot veel
groter versigtigheid te maan.
Organisasies wat op Maandag en Dinsdag aan die openbare verhore
deelgeneem het sluit in: AgriSA, ABSA, Anglo-American; TLU SA, Standard
Bank en andere. Talle ander organisasies, insluitend die Sentrum vir
Grondwetlike Regte, AfriForum en die Kamer van Mynwese het aansoek
gedoen om aan die openbare verhore deel te neem, maar het nie
uitnodigings ontvang nie. Die skriftelike voorleggings wat hierdie
organisasies aan die komitee gemaak het is op die Sentrum vir
Grondwetlike Regte se webwerf by <http://www.cfcr.org.za/>
www.cfcr.org.za beskikbaar.
Die breë gemeenskap is nog nie ten volle ingelig en op hoogte oor die
inhoud en uitwerking van die voorgestelde wet nie, en openbare
bewusmaking is tans van die allergrootste belang, omdat dié wet alle
eiendom, roerende sowel as onroerende eiendom, kan raak.
Om die publiek, die nasionale en internasionale gemeenskap die
geleentheid te bied om die volle implikasies van die wet te begryp gaan
‘n konferensie gehou word op Woensdag 2 Julie 2008 om 12:30 nm te
Radisson Hotel, Granger Bay, Kaapstad. Die konferensie sal deur die
Tussentydse Komitee vir die Verdediging van die Eiendomsreg* aangebied
wees. Dit sal onder andere die implikasies van die wetsontwerp vir die
Grondwet; beleggersvertroue; voedselsekerheid en nasionale eenheid,
asook die kernrol van eiendomsreg in alle suksesvolle moderne
gemeenskappe, bespreek. Alle media word uitgenooi om die
mediakonferensie by te woon.
Vir verdere navrae, skakel
Dave Steward - 082 824 8875
Kallie Kriel - 082 441 5073
Jaco Schoeman - 083 651 0739
Theo de Jager - 082 332 2110
Bennie van Zyl - 082 466 4470
19 Junie 2008
*Die Tussentydse (Ad-Hoc) Komitee vir die Verdediging van Eiendomsreg is
‘n informele groepering van organisasies en politieke partye van dwars
oor die politieke en maatskaplike spektrum wat teen die Wetsontwerp oor
Onteiening gekant is. Dit sluit op die oomblik die volgende
organisasies in: Afriforum, Afrikanerbond, Afrikanerfront, Agri SA, DA,
FW de Klerk Stigting, LWO, NBU, Solidariteit Instituut, TLU SA, VF+ en
VRA. Intussen is verskeie ander organisasies ook besig om hulle steun
aan hierdie groep toe te sê.
