Kaapstad. – Mnr. Gugile Nkwinti, minister van landelike ontwikkeling en grondhervorming, het boere gister gewaarsku om “saam te werk” om ’n krisis “erger as (in) Zimbabwe” te verhoed.
Boonop blyk dit die nasionalisering van grond is, ondanks beloftes tot die teendeel, nie van die tafel af nie omdat die minister dit voorstaan.
Hy het in ’n onderhoud met die ontleder Justice Malala op die eNews-kanaal gesê swart Suid-Afrikaners wil
hê landbougrond moet, soos in die struggle-jare beloof is, genasionaliseer word.
“Dit is swart Suid-Afrikaners se siening ... en myne. Mense wil radikale grondhervorming sien.”Dit volg op weke van omstredenheid nadat die departement se strategiese plan wat volgens waarnemers op die nasionalisering van grond neerkom, ter tafel gelê is.
Nkwinti het verlede week in sy begrotingstoespraak gesê die regering sal grond nie summier afvat of die Grondwet verander nie, maar stel ’n verblyfregstelsel met drie vlakke voor.
Nkwinti se onbedekte aanval op boere staan in kontras met wat hy in die verlede oor kommersiële boere se rol in die grondhervormingsproses gesê het.
Hy het boere in November verlede jaar in ’n onderhoud met Beeld geloof vir hul toewyding tot die herstel van grondregte en ook mooi woorde vir hulle gehad tydens ’n onlangse Agri SA-kongres in Somerset-Wes.
Aan Malala het Nkwinti gesê ’n tweede Zimbabwe moet gekeer word. “As hulle (boere) nie besef hulle moet saamwerk nie ... sal hulle verantwoordelik gehou word vir die skep van toestande wat tot iets ergers as Zimbabwe kan lei.”
Hy het gesê die regering voorsien nie ’n verandering aan die Grondwet nie en dat die nuwe groenskrif oor grondhervorming gaan help met die raamwerk waarbinne grondoordrag kan plaasvind.
Hy meen ook nie ’n radikale omwenteling sal voedselsekerheid bedreig nie omdat “dit aan meer opkomende boere die geleentheid sal bied om te produseer”.
Mnr. Frans Cronjé, uitvoerende adjunkhoof van die Suid-Afrikaanse Instituut vir Rasseverhoudinge, het gesê dit is ondanks Nkwinti se woorde tot die teendeel duidelik “die nasionalisering van grond ís regeringsbeleid, dit staan swart op wit”.
“Hy ontken dit, maar dit staan in die strategiese plan. As dit dan verkeerdelik ingeglip het, waarom word die direkteur-generaal (mnr. Tozi Gwanya, wat dit opgestel het) nie gerepudieer nie? Ek glo hulle eenvoudig nie. Ek sal sover gaan om te sê hulle lieg.”
Cronjé meen sulke planne sal die land onherstelbare skade berokken en die einde beteken van Suid-Afrika as ’n selfstandige, suksesvolle demokrasie.
Mnr. Johannes Möller, president van Agri SA, het Nkwinti se “dubbelpratery” betreur en gesê sy organisasie se beplanning is as gevolg daarvan net op kort termyn gefokus.
http://www.beeld.com/Content/Suid-Afrika/Nuus/1928/b96d503e951549dc8d6ee21068eb173c/29-03-2010-09-45/%E2%80%98Boere_moet_saamwerk_of_krisis_erger_as_Zimbabwe_kan_kom%E2%80%99
